Delhi sorkarin odd-even scheme hman tur ṭhulh

Delhi sorkarin khawpui boruak bawlhhlawh belh zel tihziaawmna tur kawng khat, November 13 aṭanga motor kawpkim leh kawpkim lo tlanchhawkna tur, odd-even scheme hman a tum chu a ṭhulh leh.

Sorkarin November 13-17 chhunga Odd-even scheme kalpuina tur a siamah hian two wheeler leh hmeichhe driver khalh motor a huam tel lo a, hei hi National Green Tribunal (NGT) in emergency vehicle, ambulance leh kangṭhelh motor tih loh chu huam tel tir vek tura a tih avangin he scheme hman tum hi a ṭhulh leh ta a ni.

Delhi transport minister Kailash Gahlot chuan vawiin hian green court-ah he scheme huam chin tura an duan, hmeichhe driver leh two wheeler ngaihnathiamna chu ngaihtuah ṭha leh tura an ngen tur thu a sawi. Gahlot chuan NGT thupek chu an zah hle tih a sawi a, mahse khawpui chhungah hian two wheeler hmangtu passenger maktaduai thum vel zel an awm a, two wheeler hi khap tel a nih chuan mipuite harsatna tawh chu an chinfel sak thei dawn lo niin a sawi.

Sorkar chuan odd-even scheme kalpui a nih chuan ni khatah motor ding tur hi nuai 13 zet a tling dawn a, hei vang hian mipuite'n veivahna lama harsatna an tawh loh nan bus hire belh a, bus 5,400 tlantir a tum a ni. Mahse he khuahkhirhna hian two-wheeler te a huam tel chuan bus tlanbelh tir ringawt hian mipui harsatna a phuhru thei dawn lo tih a sawi a ni.

Hetih lai hian NGT chuan khawpui chhunga nitina motor veivak, maktaduai 10 chuang zingah two wheeler chu maktaduai 6.3 vel a awm niin a sawi. Khawpui boruak tihbawlhhlawlhtu 20% chu motor-in khu a tihchhuah a nih thu sawiin, heng boruak bawlhhlawh a tihchhuah zinga 30% chu two-wheeler-te tichhuah a ni, a ti.

Delh leh National Capital Region-a air quality chu Inrinni khan tlemin a ziaawm deuh. Zirtawpni-a Delhi-a air quality index (AQI) 468 chu Inrinni zing khan 403-ah a tlahniam a, mahse zan dar 10 velah 445 a kai chho leh a ni.