GST council-in kalphung tidanglam

Goods and Services Tax chungchang ngaihtuahtu, GST Council chu kar kalta Zirtawpni khan Guwahati-ah an ṭhukhawm a, chhiah lak zat tur a tidanglam nasa hle. Chhiah lak zat tur a siam thar hi November 15 aṭanga hman ṭan tura tih a ni.

GST Council chuan GST Act hnuaia item 200 chuanga chhiah lak zat chu an tihniam. Chhiah lak san berna, 28% lak ṭhinna item 178 zetah chhiah hi 18% ah tihhniam ani a, 28% lak chhunzawmna tur hi item 50 chauh dahin, heng zingah hian cement leh rawng, lirthei, thlawhtheihna leh lawng siamna bungrua, fridge, air conditioner-te chu a la tel. Restaurant-a chhiah lak ṭhin chu 5%-ah tihhniam a ni bawk.

Prime Minister Narendra Modi chuan GST council rawtna siam chu mipuite tana hamṭhatna tur a nih thu sawiin, chhiah lak dan kalphung pawh a ṭhat sawt tur thu a sawi. He thutlukna hi GST kalpui a nih hnua rawtna hrang hrang an dawn aṭanga ngaihtuah a nih thu a sawi.

Council-in rawtna a siam ang in item 13-a chhiah lak ṭhin 18% chu 12%-ah tihniam a ni ang a, item 6-a chhiah 18% lak chu 5%-ah tihhniam niin, item 8-a 12% lak ṭhin chu 5% lak a ni tawh thung ang a, item 6-a 5% lakna ṭhinah chhiah lak a ni tawh lo bawk ang.

GST Council chuan Nil Return awlsam zawka an thehluh theih tawh thu te, tax return file lo te late fee chawi ṭhin pawh cheng 20 leh cheng 50-ah tihhniam a nih thu an sawi bawk a ni.