DMK-in Tamil Nadu Governor ban turin phût

Tamil Nadu-a rorellai party, Dravida Munnetra Kazhagam (DMK) chuan an state governor, governor RN Ravi chu boruak muanawm tichhe thei, governor han chelh tlak loah an ngai tih sawiin, president Droupadi Murmu hnenah governor a nihna aṭanga ban tura phûtin memorandum an thehlut.

President Murmu hnena memorandum an thehluhah DMK chuan,"Governor RN Ravi hian ram danpui leh dan humhalh leh venghim tura thu a lo tiamnate chu a bawhchhia a ni," tiin, khawtlangah inhuatna a chawk tho a, mipuite an aiawh tura an thlan sorkar hnathawh turte a dal a ni, an ti. Governor hi Assembly-a bill pass tawh, a pawmpuina hming ziah hnan tura thawnte tikhawtlai lui zelah an puh bawk.

DMK hian tun thla tir lam khan MP hrang hrangte hnenah lehkha thawnin, Governor RN Ravi bang tura an rawtna thlawp turin an lo ngen tawh a ni.

Tamil Nadu Assembly-in a pass tawh, Governor-in pawmpuina a la pek duh loh bill hi 20 vel a awm mek. State cabinet-in a pawm tawh bill hi Governor pawmpui tura thawn a nihin, governor hian pawm loin siamṭhat turin vawi khat a thawn let thei a ni. Cabinet-in an siamṭhat hnua an thawn leh chuan, Governor hian a thawn kir thei tawh lo.

Chhim lama BJP ni lo party dang sorkarna state pathum, Tamil Nadu bakah Kerala leh Telangana-ahte hian state sorkar leh governor-te inkarah harsatna a awm fo a ni. State sorkar-te chuan BJP-in a ruat, governor-te hian central lama BJP hruaituten an duh duha an thunun niin an sawi a, BJP-in party dang laka phuba lakna tur hmanruaah a hmang ṭhin niin an sawi.

Telengana governor Tamilisai Soundararajan pawh state politics-a inrawlh nasa lutukah puh a ni a, state university-a hna laknaah pawh a inrawlh niin rorellai party chuan an puh.

Kerala-a Left kaihhruai sorkar pawhin an state governor Arif Mohammad chu university-a Chancellor a nihna aṭanga ban a nih theihna turin ordinance siam an remti. Hei hi Governor-in state chhunga university pakuaa vice-chancellor-te banna thehlut tura hriattirna a pek vang a ni. State sorkar leh Governor inkar boruak ṭha lo tak chu he thil thleng hi a tizual hle a ni. Thawhlehni khan rorellai, Left Democratic Front (LDF) chuan state chhung hmun hrang hrangah Governor duh lohna campaign hi neiin, pamphlet-te an semkual. LDF chuan an state Governor chu Sangh Parivar hmanrua nia sawiin, ram danpui chungchang pawh a hrethiam tak tak lo a ni, an ti.