PMAY-G scheme tan Rs vbc 13,000 pek belh

Sorkar laipuiin rural area-a mi retheite tana in sak sakna tur scheme a siam, Pradhan Mantri Awas Yojana-Gramin (PMAY-G) tana sum dah chu an indaih loh avangin, union ministry of finance chuan he scheme tan hian Rs vbc 13,000 pek belh a remti.

Union budget 2022-23-ah khan PMAY-G tan hian Rs vbc 20,000 dah a ni a, kum 2022-23 chhungin he scheme hnuaiah hian chenna in nuai 52.78 sak hman a tum a ni. Mahse union ministry of rural development (MoRD) chuan fund hi an indaih tawk lo nia a sawi avangin, finance ministry chuan sum pek belh hi a remti.

MoRD-in a tarlan danin, April-October 2022 chhung khan PMAY-G scheme tana sum dah, Rs vbc 20,000 zinga 84%, Rs vbc 16,785 chu hman a ni. State eng emaw zatin in sakna tura fund pek hi an dil belh avangin, MoRD hian June thla khan finance ministry hnenah he scheme tana sum pek belh hi a lo dil tawh a ni.

June 8 khan Rural Development secretary Nagendra Nath Sinha chuan Finance secretary TV Somanathan hnenah ngenna thlenin, PMAY-G budget Rs vbc 20,000 chu in nuai 52.78 sakna atan a tawk lo tih sawiin, an target tihhlawhtlin a nih theihna atan Rs vbc 28,422 pek belh turin a lo dil tawh a ni. Finance ministry chuan a ngenna hi a ngaihtuah hnuah, Rs vbc 13,000 pek belh a remti ta a ni.

PMAY-G scheme hnuaiah, in sak ṭanpuina hi plain area-ah mi pakhat hnenah Rs nuai 1.20 leh, tlangram state-ah Rs nuai 1.30 pek a ni. Sum hi sorkar laipui leh state sorkar-in intumsemin, state dangah 60:40-a an intum sem laiin, tlangram state (hmarchhak state 8, Himachal Pradesh, Uttarakhand leh Jammu and Kashmir)-ah chuan 90:10 in an intumsem thung. UT-ah chuan sorkar laipuiin 100% a tumsak.