TV channel-te tan kaihhruaina thar siam

Union cabinet chuan TV channel-te tan ‘Guidelines for Uplinking and Downlinking of Television Channels in India, 2022’ siam thar chu a pawm a, he kaihhruaina thar hnuaiah hian TV channel-te chuan nitin ram tana thil ṭha leh pawimawh minute 30 chhung an tihchhuah ziah a ngai tawh ang.

Kaihhruaina thar hi November 9 aṭanga hman ṭan tura tih a ni a, mahse ministry of information & broadcasting chuan TV channel-te hi an tihchhuah turte buatsaih leh insiamremna turin hun pek an ni dawn tih a sawi.

TV-a minute 30 chhung tihchhuah ṭhin tur tan hian theme pariat siam a ni a, chungte chu - (i) education and spread of literacy; (ii) agriculture and rural development; (iii) health and family welfare; (iv) science and technology; (v) welfare of women; (vi) welfare of the weaker sections of the society; (vii) protection of environment and of cultural heritage; leh (viii) national integration te a ni.

I&B secretary Apurva Chandra chuan broadcaster leh stakeholder-te nena inberawnin, theme hrang hrang tihchhuah dan tur leh, a tihchhuah hun turte an la siam dawn tih a sawi. He kaihhruaina thar hi kalpui a nih hunah, ministry chuan channel hrang hrangte hi a enfiah reng dawn a, dan zawm lote chu insawifiah tura koh ṭhin a ni ang.

He kaihhruaina thar hi channel ṭhenkhatah erawh ngaihhnathiam a ni dawn a; sports channel, wildlife leh foreign channel-te pawh ngaihhnathiam an ni ang. Guideline kimchang hi sorkar chuan tihchhuah thuai a tum.