Mumbai-ah sentut hri vei tam vangin high-level team tir

Union health minitry chuan tunhnaiah Mumbai khawpuia sentut vei an tam avangin thil awmdan enfiah turin Nilaini khan high-level multi-disciplinary team a tir.

Central team hian state health authority thawhpuiin, hri venna leh khuahkhirhna tura hmalak dan turte a enpui dawn a ni.

Member pathum awmna, central team hi Integrated Disease Surveillance Programme (IDSP), NCDC-a deputy director Dr Anubhav Srivastava-a'n a ho a, member dang pahnihte hi Lady Hardinge Medical College, New Delhi leh Regional Office for Health and Family Welfare, Pune, Maharashtra-a mite an ni. Central team hian sentut hri vei tamna hmunte an tlawh kual ang.

Mumbai civil official chuan kumin chhungin Mumbai khawpuiah hian sentut vangin naupang pathum an thi tawh a, mi dang 90 velin an vei tawh bawk niin a sawi. Brihanmumbai Municipal Corporation (BMC) chuan sentut veite enkawlna tur hian Kasturbi Hospital-ah special ward a siam tawh a ni.