Delhi sorkarin a petition thehluh a sut

Delhi sorkarin khawpui boruak bawlhhlawh zel tihziaawmna kawng khat atana motor number kawpkim leh kawpkim lo intlanchhawk, Odd-even scheme a kalpui tumah National Green Tribunal (NGT) in ngaihnathiam chin nei lo tura rawtna a siam a, hemi chungchanga Delhi sorkarin petition a thehluh chu nimin khan a sut leh.

Delhi sorkar hian November 13 aṭanga Odd-even scheme kalpui a tumah hian two-wheeler leh hmeichhe driver-te a huam tel tir lo a, mahse NGT hian ngaihnathiam chin nei lo tura a tih avangin a scheme kalpui tur pawh a ṭhulh phah a ni. State sorkar chuan two-wheeler te hi huam tel an nih chuan mipuite'n veivahna kawnga harsatna an tawhte an phuhru thei dawn lo niin a sawi.

NGT chuan nimin khan petition thehluh chungchang hi ngaihtuahin, Delhi sorkar hnenah two-wheeler-te hian four-wheeler te aiin boruak an tibawlhhlawh nasa zawk nia report a awm laia, a scheme kalpui tumah two-wheeler-te a huam tel tir loh chhan hi a zawt let a ni. NGT chuan boruak tibawlhhlawhtu 30% chu two-wheeler an nih thu a sawi. Hmeichhe driver-te ngaihnathiam a tum chungchangah, hmeichhe khalh bus-te a tlantir mai loh chhan te a zawt a ni.

NGT chuan sorkar in hmalakna awmze nei zawk a kalpui theih loh chhan leh ngaihnathiam chin a neih chhan a zawt a, a hmaa odd-even scheme a kalpui pawhin mipuite harsatna phuhruk nan bus 4,000 a tlanbelh tir a, eng vanga hetianga ti leh mai lo nge a nih a zawt a ni.