PM hlui Rajiv Gandhi thah thubuaia thiam loh chantirte SC-in chhuah

Supreme Court chuan kum 1991-a prime minister hlui Rajiv Gandhi tualthah thubuai thiam loh chantira damchhung tang tura hrem, Nalini Sriharan leh RP Ravichandran-te chu nimin khan jail aṭangin a chhuah zalen. Anni bakah he thubuaia thiam loh chantir dang palite pawh chhuah zalen vek an ni bawk.

Nimina Supreme Court-in a chhuah zalente hi Nalini leh Ravinchandran bakah Jayukumar, Robert Pias, Suthendraraja leh Sriharan-te an ni.

Tamil Nadu chuan kum 2018, September 9 khan tangte chhuah zalen tura rawtna hi governor hnenah a lo thlen tawh a, mahse Governor chuan thutlukna siam loin President hnenah a thawn chhawng a ni. Tang parukte hian court-ah chhuah hma tura ngenna hi an lo thlen tawh a ni. Nimin khan justice BR Gavai leh BV Nagarathna awmna bench chuan an ngenna hi ngaihtuahin jail-a an tan chhungin nungcha ṭha taka awmin, jail chhungah lehkhate zir chhunzawmin, degree-te an neih thu a sawi.

May 18 khan Supreme Court chuan Constitution Article 142 hnuaia a thuneihna hmangin, thiam loh chantir zinga mi, kum 30 chuang tang tawh Perarivalan chu a lo chhuah zalen tawh bawk.

Nimina court-in a chhuah mi parukte hi kum 23 chuang jail-ah an tang tawh bawk a ni. Nalini leh Ravichandran-te hian nikum December thla khan Tamil Nadu sorkar chuan parole-in a chhuah tir a ni.

Prime minister hlui Rajiv Gandhi hi kum 1991, May 21 khan election campaign a neihna hmun, Tamil Nadu-a Sriperumbudur-ah hmeichhe pakhat, Dhanu chuan thihchilh bomb hmangin a tihlum a ni. Gandhi thah thubuaiah hian mi pasarih thiam loh chantir an ni. Kum 1999 khan Supreme Court chuan an zinga pali chu tihhlum tur leh, pathum chu dam chhung tang turin a hrem. Mahse a hnuah tihhlum tura tihte hremna hi tihnep sakin, dam chhung tang tura tih an ni.