Assembly inthlan neihna tur Gujarat-ah thil sem tur Rs vbc 64 man hu man

Kumin December thlaa state assembly inthlan neihna tur, Gujarat-ah chuan vote zawnna atana hman tum, pawisa fai bakah zu, drugs leh thil dang cheng vaibelchhe 64 hu man a ni.

Directorate of Revenue Intelligence chuan heng thilte hi Munda port-ah an man a ni. Hemi hma hian voter-te hnena thil sem tur hi eng emaw zat man a lo ni tawh a, an thil man tawh zawng zawng hi Rs vbc 71.88 man a tling tawh niin Election Commission chuan a sawi.

Assembly inthlan hmasa, kum 2017-a neiha thil sem tur an mante kha a vaiin Rs vbc 27.21 hu a ni a, kuminah chuan a let eng emaw zata tam an man der tawh a ni.

EC chuan thuchhuah siamin, Gujarat inthlan neih hun tur puan a nih aṭanga rei lote hnuah vote zawnna atana hman tum thil hrang hrang man nghal a nih thu a sawi. An thil man zingah hian zu litre nuai 1.10, Rs vbc 3.86 pawh a tel tih a tarlang. Munda port-a ram pawn aṭanga thil lakluh tam tham tak manah hian a ruahmantu ber nia puh mi pakhat leh a thurualpui pawh man tel an nih thu a sawi bawk.

Assembly inthlan neihna tur dang, Himachal Pradesh-ah pawh vote zawnna atana thil sem tur an man hi inthlan hmasaa an man aiin a let nga zet in a tam. HP-ah an thil man zingah hian zu litre nuai 9.72, ruihhlo Rs vbc 1.20 hu, tlereuh Rs vbc 13.99 leh thil dang Rs nuai 41 hu an man tawh a ni. Kumina an man hi Rs vbc 50.28 hu ni tawhin, kum 2017-a an man kha Rs vbc 9.03 hu a ni thung.