JNU-a intihbuaina thlengah pawn lam mi inrawlhah puh

Delhi-a Jawaharlal Nehru University (JNU) campus chhungah Ningani khan zirlai ṭhenkhat intibuaiin mi pahnihin hliam an tuar.

Students Union Councillor Anagha Pradeep chuan mimal thilah zirlaite hi an intihbuai laiin, buaina chhuah hnuah pawn lam mite hruai luh an ni tel a ni, a ti. Buaina chhuah chhan pakhat chu campus-a security guard awm ṭhat tawk loh vang a ni tih a sawi bawk.

Councillor chuan hostel pakhatah intihbuaina a thlen lai hian security office lam hriattir nghal a ni a, mahse security lam leh JNU thuneitute lam chuan hma a la zui lo a ni, a ti. Campus chhunga security dinhmun chu a ṭha lo hle tih sawiin, JNU hotute leh Delhi police lamin tharum thawhna thlen hi an ngaihsak loh ṭhin avangin campus pawh a him lo sawt hle a ni, a ti.

Buaina chhuak chungchangah hian Delhi police-te chuan nimin FIR pahnih an ziaklut. Deputy Commissioner of Police (southwest) Manoj C chuan zirlai pahnihte complaint thehluh bawhzuiin, Indian Penal Code-a section 323, 341 leh 34 hnuaiah FIR hi ziahluh a nih thu a sawi.