Argentina laka Chakna goal khungtu Gotze a tel

Nimin khan FIFA World Cup khel tur Germany squad an puang a, 2014 FIFA World Cup-a Argentina laka chakna goal khungtu Mario Gotze a tel. Coach Hansi Flick chuan senior team tana la khel lo Youssoufa Moukoko (Borussia Dortmund) leh Niclas Fullkrug (Werder Bremen) te a ko tel bawk.

Kum 30 mi Gotze hian season ṭantirh khan PSV Eindhoven aṭangin Eintracht Frankfurt a zawm a, league match 13 aṭangin goal hnih a khung tawh. Bundesliga-ah Frankfurt hian match 14 aṭangin point 26 an hmu a, palina a ni mek.

Germany-ah hian Manuel Neuer chuan captain hna a chelh tawh dawn a, Bayern Munich keeper hi World Cup-a a vawi li inlan tur a ni ang. Kum 36 mi Neuer hian ram tan vawi 113 a khel tawh a, tawnhriat nei player dang Thomas Muller (118 caps) and Joshua Kimmich (70), Mario Gotze (63) leh Ilkay Gündogan (62) te pawh an tel.

Flick hian senior player leh naupang zawk player-te a chawhpawlh ṭha a, Real Madrid midfielder Toni Kroos erawh Euro 2020 zawh khan ram tana khelh a chawlhsan tawh. Hliam vangin Timo Werner a tel thei lo a, Germany tan channa nasa tak a ni ang.

Borussia Dortmund captain Marco Reus pawh inhliam vnagin a tel dawn lo. Reus hi a vanduai ṭhin hle - inhliam vangin World Cup 2014, Euro 2016 leh Euro 2020 ah khan a tel tawh lo.

Tunkar tawp hian Bundesliga match khat a la awm dawn a, Thawhṭanni hian Germany-in Oman an pan dawn - November 16, Nilaini zan dar 10:30 hian friendly match an khel ang.

November 17, Ninganiah Doha an pan zui ang a, Japan nen Khalifa International Stadium-ah November 23, Nilain zan dar 6:30-ah World Cup-a an match hmasa ber an khel dawn.

Hansi Flick-a hote hi Japan bakah Spain leh Costa Rica nen group khatah an awm a, knockout stage khel turin hmabak a harsa dawn hle.

Germany Squad:
Goalkeepers: Manuel Neuer (Bayern Munich), Marc-Andre ter Stegen (Barcelona), Kevin Trapp (Eintracht Frankfurt)
Defenders: Armel Bella-Kotchap (Southampton), Matthias Ginter (SC Freiburg), Christian Gunter (SC Freiburg), Thilo Kehrer (West Ham), Lukas Klostermann (RB Leipzig), David Raum (RB Leipzig), Antonio Rudiger (Real Madrid), Nico Schlotterbeck (Borussia Dortmund), Niklas Sule (Borussia Dortmund)
Midfielders: Julian Brandt (Borussia Dortmund), Leon Goretzka (Bayern Munich), Ilkay Gundogan (Manchester City), Jonas Hofmann (RB Leipzig), Joshua Kimmich (Bayern Munich), Jamal Musiala (Bayern Munich),
Forwards: Karim Adeyemi (Borussia Dortmund), Niclas FullKrug (Werder Bremen), Serge Gnabry (Bayern Munich), Mario Gotze (Eintracht Frankfurt), Kai Havertz (Chelsea), Youssoufa Moukoko (Borussia Dortmund), Thomas Muller (Bayern Munich), Leroy Sane (Bayern Munich)