Delhi leh Haryana CM-ten thawhdun an tum
Delhi Chief Minister Arvind Kejriwal leh Haryana Chief Ministre Lal Khattar-te chu nimin khan Haryana-ah inhmuin, Delhi leh National Capital Region-a boruak bawlhhlawh belh zel tihziaawm dan kawng zawnga thawhdun dan turte an sawidun.
Hruaitu pahnihte hian lo hal khu leh motor khu avanga boruak bawlhhlawh zel ven dan turte an sawidun a, meeting an neih zawh hnu hian joint press conference an nei zui nghal a ni.
Arvind Kejriwal-a hi Haryana CM hmu tur hian Chandigarh-ah a kal a, meeting hlawk tak an neih thu sawiin, harsatna an tawh mek chinfel dan kawng zawngin a theih ang angin hma an lak nghal tur thu a sawi.
Lal Khattar chuan air pollution chu mitinte nghawng thil a nih thu sawiin, Haryana chuan Delhi-a air quality level ṭha zawk a awm theih nan a theihtawp a chhuahpui dawn a ni, a ti. Satellite dateaṭanga a landanin Haryana state chhungah chuan lo hal khu chu a ziaawm sawt hle niin a sawi bawk.
Kerjiwal-a hian Delhi khawpui boruak bawlhhlawh zualna chhanah Punjab leh Haryana-a loneitute lo hal khu a puh tel avangin Haryana-a eptu party-te chuan CM Khattar chu Kejriwal-a meeting a neihpui avangin an sawisel nasa hle.
Hetih lai hian Punjab Chief Minister Amarinder Singh chuan Kejriwal-an meeting neihpui tura a sawmna chu a hnar thung a, Kerjiwal-a chu Delhi-a air pollution nasa vanga harsatna thleng mek chu politics khelhna hmanruaa hmang lo turin a ti a, he thil hi thil liantham tak a ni a, sorkar laipui inrawlh a ngai a ni, a ti.
Delhi sorkar chuan National Green Tribunal (NGT) ah petition thar a thehlut leh a, tun ṭumah chuan air pollution sang zel tihziawmna tura hmalakna kawng khat, odd-even scheme chu an ṭhenawm state, Haryana, Punjab leh Uttar Pradesh-ah te pawh hmantir ve turin a ngen. Delhi sorkar hian November 13 aṭang khan odd-even scheme hi kalpui a tum a, mahse he scheme hian two-wheeler leh hmeichhe driver-te a huam tel loh vangin NGT chuan a sawisel a, hei vang hian scheme kalpui a tum pawh hi a ṭhulh leh rih a ni. Petition a thehluh tharah hian odd-even scheme hnuaia two-wheeler leh hmeichhe driver-te ngaihnathiamna chu phalsak turin a ngen nawn leh a ni.