State hrisel ber Kerala

Medical journal Lancet-in tunhnaia zirchianna a neih a tihchhuahah India ram state zinga hrisel ber chu Kerala niin a tarlang.

Lancet zirchianna neihah hian India mipuite hriselna dinhmun chuan hma sawnin, kum 1990-a chawhruala mihring dam chen, hmeichhe kum 59.7 leh mipa kum 58.3 chu kum 2016-ah chuan hmeichhe kum 70.3 leh mipa kum 66.9 ah a kai chho tawh niin a sawi.

Kerala chu state hrisel ber nia sawiin, he state-a mipa dam chen chu chawhrualin kum 73.8 a ni a, hetihlai hian Assam-a mipa dam chen chawhrual chu kum 63.6 a ni thung. Kerala-a hmeichhe dam chen chawhrual chu kum 78.7 a nih laiin, Uttar Pradesh-ah chuan kum 66.8 a ni thung.

Punjab leh Tamil Naidu te chu diabetes vei tamna state niin, Uttar Pradesh, Bihar, Jharkhand leh Odisha-te chu tui thianghlim lo, inthiarna ṭha lo leh kut silfai tawk loh vanga naupang kum nga hnuai lama kawṭhalo vanga thihna thlen tamna a ni bawk.