Dan loa ram neia puh Kerala minister a bang

Kerala Transport Minister Thomas Chandy chu dan kalha ram neia puh a nih avangin nimin khan minister a nihna aṭangin banna a thehlut.

Minister Chandy hian nimin khan Nationalist Congress Party (NCP) leader TP Peethamabaran kaltlangin, Chief Minister Pinarayi Vijayan-a hnenah banna lehkha a theh lut a ni. Banna a thehluh chungchang ngaihtuah hian state cabinet meeting pawh neih nghal a ni a, meeting neih hma hian Chanduy hian CM pawh a hmu a ni.

Chandy hian Kerala cabinet member zinga hausa ber niin, dik lo taka ram neia puh a nih hnuah pawh cabinet member a nihna aṭangin a bang mai duh lo a, hei hian rorellai LDF leh Chief Minsiter Vijayan dinhmun pawh a tihchhiat phah hle nia sawi a ni.

Chandy hian Alapuzha-ah five star resort a nei a, a resort neihna bula dik lo taka nei tela puh a nih bakah, a resort panna tur hian dan kalhin leilet kaltlangin kawng a siam nia puh a ni bawk. A ram neih dan dik tawk lo hailan a nih hnuah CM Vijayan chu cabinet aṭanga Thomas Chandy-a ban tur hian nawr a ni fo tawh a ni. CM hian a ban mai loh avangin cabinet meeting a kohah pawh Chandy a tel ve avangin minister pali, Agriculture Minister Sunilkumar, Civil Supplies Minister Thilothaman, Forest Minister K.Raju leh Revenue Minister Chandrasekharan-te chuan cabinet meeting hi an boycott a ni.