TMC hruaituin President Murmu chungchang a sawi danah BJP-in WB CM Mamata Banerjee ngaihdam dil turin an phut

West Bengal-a rorellai, Trinamool Congress hruaitu Akhil Giria-a'n president Droupadi Murmu chungchang ṭawngkam mawi lo taka a sawi avangin Bharatya Janata Party (BJP) chuan West Bengal chief minister, Mamata Banerjee chu ngaihdam dil turin an phut.

BJP MP Locket Chatterjee chuan TMC hruaitu Giri thusawi avang hian nimin khan police-ah complaint a thehlut a ni. Chatterjee chuan Indian Penal Code (IPC) bakah, Scheduled Castes and Scheduled Tribes (SC/ST) Act hnuaiah Giri hi thubuai siamsak a phut tih a sawi. TMC hotu Mamata Banerjee pawh Giri hi suspend tur leh, a thusawi avang hian President Murmu hnena ngaihdam dil tura a phut thu a sawi. "Mamata Banerjee chuan a minister thusawi avang hian thupha chawina thuchhuah a siam a, minister a nihna aṭanga a ban nghal a ngai a ni. Delhi-ah lo kalin ngaihdam rawn dil rawh se," a ti.

Akhil Giri hian President chungchang hi kar liam ta Zirtawpni khan West Bengal-ah eptu hruiatu, Suvendhu Adhikari a beihnaah a sawilang tel a ni. Giri chuan, "Suvendhu Adhikari chuan ka hmeltha lo hle tih a sawi. Ani chu a hmelṭha bik hle a ni! Mi hi an pawnlam landan aṭang ngawtin kan teh lo. President of India pawh hi kan zah em em a, mahse President hmel hi eng nge a nih bik?" tiin a sawi. A thusawi hi social media lamah a darh nghal a, eptu party leh TMC mi leh sa ngeite pawhin an sawisel nasa a ni. Inrinni khan Giri hian ngaihdam dilna thuchhuah siam nghalin, President chungchanga a thusawi dan chu pawi a tih thu leh a inchhir thu a sawi a, Constitution leh President post-te chu a zah em em tih a sawi. "President tih tawpin ka sawi a, mimal hming tumah ka sawi lang lo. Mahse ka thusawi hi India President chuan hmusitna anga a lo ngai a nih chuan, pawi ka ti takzet a ni," a ti.

BJP West Bengal unit hruaitute chuan Mamata Banerjee kaihhruai sorkar chu beihna remchangah hmangin, 'anti-tribal' tiin an puh. BJP MP Saumtira Khan chuan National Commission of Women (NCW)-ah lehkha thehlutin, Akhil Giri chu man turin a phut bawk. "President Murmu chungchanga Giri-a'n a sawi dan hi inhmusitna a ni," tiin a lehkha thehluhah hian a ziak.