Sakhaw inlehluihtir ṭhin titawp turin sorkar a inrawlh a ngai : SC

Supreme Court chuan inbumna, vehthlem leh tihluihna hmanga sakhaw inlehtir ṭhin chu ngaihzam mai chi a ni lo, a ti. Hetianga innawrluihna thleng ṭhin hian ram himna thlengin a tiderthawng thei a, tihtawp a nih theihna atan sorkar laipui pawh a inrawlh a ngai tih a sawi.

Nimin khan Supreme Court hian advocate leh BJP hruaitu, Ashwimi Kumar-a petition thehluh; vehthlem, invauna leh thilpek hmanga sakhaw inlehtirna thleng ṭhin titawp tura sorkar laipui leh state sorkarte hma la tura hriattir tura a ngenna chu a ngaihtuah a ni. Sorkar laipui chu a hma lak dante sawi a, November 22 hma ngeia affi davit thehlut turin Court chuan a hriattir nghal bawk.

Solicitor general Tushar Mehta chuan hetianga sakhaw inlehtir hi tribal area-ah a thleng nasa bik niin a sawi. Justice MR Shah leh Hima Kohli awmna bench chuan, "He thil hi ngaihtuah ngai tak a ni a, sorkar laipui pawhin a ngaih pawimawh hle a ngai. Hma a lak loh chuan thil khirhkhan tak tak a thleng thei a ni. Ram himna te, sakhaw zalenna thlengin a nghawng a ni. Chuvangin sorkar laipui chuan sakhaw inlehluihtirna thleng ṭhin titawp tura hma lak dan turte chiang taka a tarlan a ngai a ni," a ti.

Court chuan November 28-a hemi chungchang hi a ngaihtuah leh ang.