Punjab sorkarin silai fakna lam hla tihchhuah khap

Punjab sorkar chuan silai fakna leh tharum thawhna thlawpna lam hla tihchhuah te, social media-a silai thlalak tarchhuahte a khap bakah, state chhunga arms licence pekchhuah pawh ennawn a tum.

State sorkar chuan Pathianni khan khapna thupek hi tichhuakin, police-te chu state chhung hmun hrang hrangah surprise checking neih ṭhin tur leh, hnam bil inhuatna lam thu sawitute chu thubuai siamsak ṭhin turin a ti. Hengte hi dan leh thupek ṭha taka kenkawh a nih theihna tura hmalakna a nih thu a sawi bawk.

Punjab sorkar chuan an state-a inkahna thleng leh ṭhin avangin he thupek hi a siam a, inkahna thlengte hi eptute chuan chief minister Bhagwant Mann kaihhruai AAP sorkar beihna atan an hmang fo a ni.

November 4 khan Shiv Sena leader Sudhir Suri kahhlum a ni a, November 10 khan Dera Sacha Sauda zuitu pakhat kahhlum a ni leh bawk. Heng pawikhawihna thlengte hi AAP sorkarin dan leh thupek a kenkawh ṭhat loh vang niin eptute chuan a puh.

State sorkar chuan thla thum chhungin arms licence pekchhuah chu ennawn a tum a, a dik lo hnena licence hi pek a nih chuan cancel nghal a ni dawn tih a sawi.