BJP hruaituin Muslim-te vau

Uttar Pradesh-a Bharatiya Janata Party (BJP) hruaitu Ranjeet Kumar Srivastava chuan Muslim-te chu BJP vote turin a ti a, an vote lo a nih chuan harsatna an tawk ngei dawn ni a sawiin a vau.

BJP hruaitu hi Barabanki district-a civil poll neih turah a nupui tan a campaign a, Muslim te vauna thu hi November 13-a Srivastava-a public meeting neihnaah a sawi a ni. He meeting-ah hian Uttar Pradesh-a BJP sorkar minister pahnih–Dara Singh Chauhan leh Ramapati Shastri te pawh an tel. Srivastava thusawi video clip hi thehdarh a ni a, he video-ah hian mipuite chu Samajwaadi Party-in a puih theih loh thu hrilhin, district chhunga kawngpui leh tuiluankawr siam hna thawkte chu civic body hnuaia thawh a ni a, heng hna thawhte hi thawk zo tur an duh a nih chuan BJP vote turin a ti. State sorkarna chelh mektu, BJP candidate an vote lo a nih chuan a hmaa harsatna an lo hriat ngai loh pawh an tawk ngei dawn niin a hrilh. Muslim-te chu BJP candidate vote tura hrilhin, an vote chauhin thlamuang taka an awm theih tur thu a sawi.

Muslim-te a vau nia an puhna chu a dik lo niin Srivastava chuan a sawi thung a, vau loin BJP vote turin a ngen mai niin a sawi.