Gujarat inthlan hmain President-ah Rahul dah dawn

Congress vice president Rahul Gandhi chu Gujarat assembly inthlan neih hmain party president-ah dah a nih rin a ni.

Gujarat assembly inthlan hi December 9 leh 14 hian neih a ni ang.

Vawiin hian Congress Working Committee, CWC chuan Sonia Gandhi-i chenna, 10 Janpath-ah chawhma dar 10.30 aṭangin meeting an nei dawn a, he hunah hian party president thlan hun tur an ngaihtuah fel rin a ni.

Party president thlanna turah hian Rahul Gandhi hi candidate awmchhun a nih rin a ni. Party hruaitute chuan Rahul hi vice president aṭang hian president dinhmuna hlankai mai an duh a, mahse Rahul Gandhi hian party president dinhmun hi inthlan hmang ngeia chuh a duh thung. Mahse inthlan neih turah hian candidate dang an awm loh chuan, Gandhi hi president atan hian tlingah puan nghal a ni ang.

Hetih lai hian Gujarat assembly inthlan neih tur atan party hrang hrangte an campaign ngawrh tawh hle. Inthlan thawh khatna chuh tumte tana nomination thehluh hun chu naktuk hian a tawp tawh dawn a ni.