Bill Gates-an UP leh AP CM a kawm

Microsoft company dintu, Bill Gates chuan Uttar Pradesh Chief Minister Yogi Adityanath leh Andhra Pradesh Chief Minister Chandrababu Naidu-te a kawm.

Bill Gates chuan Andhra Pradesh-a encephalitis hri umbo tuma hmalakna kawngah Bill and Melinda Gates Foundation chuan state sorkar chu a theih ang anga a puih tur thu a sawi. Uttar Pradesh-ah hian thluaka khawsik lut, encephalitis hi kumin chhungin naupang 4,772 in an vei a, an zinga 588 hian an thihpui tawh a ni. CM Adityanath chuan nu leh naute hriselna tichangtlunna kawngah foundation chuan a pui dawn tih a sawi, Gates pawhin an pawl chuan hri leng ṭhin khuahkhirh a nih theih nan leh faina lama hmasawnna thlen turin an thawk dawn tih a sawi bawk.

Andhra Pradesh Chief Minister Chandrababu Naidu pawhin an state-a sorkar department hrang hrangten loneitute hmasawnna tura an hmalak leh hnathawh dan an pholante chu Bill Gates nen hian an thlir dun tih a sawi. Gates hian AP Ag-Tech Summit -2017-ah loneitute ṭanpuina tura Andhra Pradesh sorkar hma lak dan chu a fak thu a sawi. Gross Domestic Product (GDP) a san chuan ram economy dinhmun a ṭha a ni ringawt lo a, retheihna khur aṭangin miretheite a khaichhuak tel a ni, tiin Gates chuan a sawi.