Delhi sorkar in school enfiahna tur list 117 siam

Delhi sorkar chuan school hrang hrang hnenah an school-a naupangte him leh him loh enfiahna tur checklist point 117 a siam a, point tinte chu zawm vek tur leh, a bawhchhia chu ngaihnathiam an nih loh tur thu a sawi.

Checklist siamah hian toilet aṭanga cybersecurity thlenga himna tur a huam tel a, tunhnaia Gurgaon-a school compound chhunga mipa naupang thah a nih leh, Delhi school-a hmeichhe naupang pawngsual a nih hnuah he ruahmanna hi siam a nih thu official-te chuan an sawi.

Directorate of Edu-cation (DoE) chuan checklist-ah hian school safety committee dinna tur te, thla tina school compound chhunga security lam fel lo a awm leh awm loh enfiahna tur te, school hungna bang him zawk siam te, CCTV surveillance dah te, school chhunga lutte record zel leh, school tlawh tumte laka khuahkhirhna khauh zawk siamna turte a tel a ni, a ti.

"Toilet tinte chu a eng ṭha tawk tur a in a, pawn lam aṭanga kalh khum theih loha siam tur a ni. Primary level-ah chuan toilet-ah hmeichhia chauh duty tir tur a ni a, Class 2 hnuailam toilet-a kalte chu zirtirtu hmeichhiaten an kalpui ṭhin tur a ni", a ti. Sorkar chuan naupang, school hour piah lama school-a awm khawtlai tir turte chu a hmain an nu leh pate remtihna ziakin an dil vek phawt tur a ni, a ti bawk.