IT deptt-in Jaya-i in an dap

Income Tax Depart-ment chuan Tamil Nadu chief minister hlui, Jayalalithaa-i in, Chennai-a Poes Garden chu kar kalta Zirtawpni khan an dap.

IT official-te hian AIADMK hruaitu, Poes Garden-a cheng ve, VK Sasikala-i chenna pindan pahnih an dap a, computer pahnih leh laptop pali an man. Sasikala-i eiruk thubuaia thiam loh chantir a nih vangin Bengaluru jail-ah a tang mek a ni. Jaya-i personal assistant hlu, Poongundran room pawh an dap bawk.

Sasikala-i vahpa, TTV Dhinakaran-a chuan Poes Garden dap a nih chungchangah sorkar laipui leh state sorkar te a sawisel a, politics thila phuba lak an tumna niin a puh. Dhinakaran-a chuan Tamil Nadu Chief Minsiter E Palaniswami-a kaihhruai, AIADMK sorkar chu Jayalalithaa-i phatsanah a puh bawk.

Jaya-i in dap a ni hi AIADMK member ṭhenkhat chuan duh loin, IT official-ten an dap lai pawh hian pawn lamah lungawi lohna an lo lantir a ni. Police-te chuan Sasikala-i lamṭang, AIADMK member eng emaw zat an man.

Dhinakaran-a chuan Inrinni khan Tuticorin-ah reporter-te kawmin, Jaya-i in dap a nih chungchanga a lungawi loh thu a sawi. Prime Minister Narendra Modi-a pawh bei telin, Jaya-i chu a ṭhianṭha tak nia a sawi chungin hun rei tak damdawi-ina a awm chhung khan a tlawh miah lo tih a sawi. Mahse eptu pawl, DMK hruaitu Karunanidhi tlawh tur erawh chuan hun a nei thei si a ni, a ti.

IT department hian a sum lakluh phu loa hausaa puh, Sasikala-i leh a chhungte in leh hnathawhna hmun 187 chu kar kala khan an lo dap tawh bawk a ni. Thil hlu cheng vaibelchhe 1,430 hu bakah lehkha pawimawh chi hrang hrang an man a ni.