Khawvela mihring awm zat tld 8 tling ta ; Mihring punna lamah India-in thawh hlawk ber

Khawvela mihring awm zat, world population chu nimin khan tluklehdingawn 8 a tling ta. Hemi pual hian UN Population Fund (UNFPA) chuan special graphic a siam a ni.

Mihring pun chak lamah India ram chu a thawh hlawk ber a ni a, khawvela mihring tam berna ram China chu nakkumah a lehpel rin a ni bawk.

UNFPA chuan tluklehdingawn 8 tlinna turah Asia leh Africa lam chuan an thawh hlawk tih sawiin, kum 2037-ah tluklehdingawn khata pun belh leh turin a chhut bawk. Hetih lai hian China leh Europe-ah mihring punna chu a tlahniam dawn thung a ni.

Khawvela mihring hi kum 12 chhungin tluklehdingawn khatin an pun belh. Mihring punna kawngah hian India chuan maktaduai 177 thawhin, China chuan mtd 73 a thawh thung. Khawvel pum huapin mihring punna hi a muang tawh a, hei vang hian tluklehdingawn khata pun belh leh tur chuan kum 14.5 a ngai tawh dawn niin UN chuan a chhut.

Kum 12 chhunga mihring maktaduai 7 aṭanga maktaduai 8-a a tlin chhohnaah, mihring pun tam zualna, 70% chu low-income leh lower-middle-income ramah a ni. Maktaduai 8 aṭanga maktaduai 9-a tlinna turah pawh, a pun belhna aṭanga 90% chu heng ramah bawk hian a ni leh dawn niin UN chuan a sawi.

Kum 2020-a mihring tamna bial pahnih chu Asia ve ve niin, Eastern and South-Eastern Asia-ah mi tld 2.3 awmin, khawvel puma mihring awm zat aṭanga 29% a tling. Central and Southern Asia-ah mi tld 2.1 awm bawkin, hei pawh hi khawvel puma mihring awm aṭanga 26% a tling a ni.