Ram pumah hri kai thar 474 awm

India ramah Covid-19 hri leng a ziaawm zel a, Thawhṭanni khan ram pumah hri kai thar 474 a awm a, hei hi kum 2020, April 6 hnua ni khata hri kai thar an tlem ber ni a ni.

Hri kai hmuh chhuah tawh hi mi 4,46,67,398 awm tawhin, an zingah hri kai mek, active case chu 7,918 an la awm. Hri kai mek hi hri kai tawh aṭangin 0.02% ah a tla thla tawh.

Hripui vanga thi hi Thawhṭanni khan mi pakhat awmin, Covid-19 thihpui hi mi 5,30,533 an awm tawh a, hri kai tawh aṭanga 1.19% an ni.

Union health ministry chuan Covid-19 vaccine pek hna kalpui mekah, Thawhlehni zing dar 8 thleng khan dose vaibelchhe 219.81 pek a ni tawh tih a tarlang bawk.

India ramah kum 2020, August 7 khan Covid-19 hri kai hmuh chhuah hi mi nuai 20 an tling a, August 23-ah nuai 30, September 5-ah nuai 40 leh September 16-ah nuai 50-ah an kai chho hman a ni. Hemi kum vek September 28-ah nuai 60 tlingin, October 11-ah nuai 70, October 29-ah nuai 80, November 20-ah nuai 90 leh December 19-ah vaibelchhe khat an tling. Kum 2021, May 4-ah vaibelchhe hnih tling lehin, June 23-ah vaibelchhe thum an tling a, kumin January 25 khan ram pumah hri kai hmuh chhuah hi vaibelchhe li an tling a ni.