US-ah Indian zirlai an pung chak

Kum 10 kalta chhungin US-ah India aṭanga zirlai kal kumtinin an pung chho zel. Thawhṭannia Open Doors Report 2022 tihchhuah chuan kum 10 kalta chhungin US-a international student awm zinga India aṭanga kal chu 11.8% aṭangin 21% ah an pung tih a tarlang.

US-a hian China aṭanga zirlai kal hi an la tam ber a, mahse kum hnih chhung chu a zawnin an tlahniam tawh thung. Kum 2021-22-ah zirlai China aṭanga kal zat hi 8.6% a tlahniamin, zirlai nuai 2.9 an awm. Kum 2014-2015 hnua China aṭanga zirlai kal an la tlem ber ṭum a ni. Hetichung hian US-a international student awm zinga 30.6% chu China aṭanga kal an la ni pha tho a ni.

Hetih lai hian India ram aṭanga kal an pun zel avangin kum 2022-23 chhungin China aṭanga zirlai kal awm zat hi an pelh chhoh rin a ni. Kumin June-August chhung khan Indian zirlai 82,000 hnenah visa pek an ni a, hei hi ram pakhat tana pek chhuah tam ber a ni. Kum 2021-22 khan student visa hi 62,000 hnenah pek a ni tih New Delhi-a US embassy-a Minister Counsellor for Consular Affairs Don Heflin chuan a sawi.

US-ah hian kum 2020-21 khan ram dang aṭanga lehkha zir tura kal, international student nuai 9.14 awmin, kum 2021-22-ah nuai 9.48-ah an pung. India ram aṭang chauh ni lo, ram dang aṭang pawhin US chu zirlaiten zirna sang zawk zirna atana an duh ber a ni, tiin Heflin chuan a sawi. US-a Indian zirlai awm tam ber chu master programme zir an ni tih a sawi bawk. China leh ram dang pali - Vietnam, Saudi Arabia, Kuwait leh Hong Kong tih loh, ram dang zawng aṭang chuan China-a zirlai lut hi an pun belh zel a ni.