Delhi-ah loneituten nawrh huaihawt

Loneitute chuan nimin khan Delhi-a Parliament Street-ah an thlai tharchhuah man tihsan sak leh, an leibate ngaihdam phutin an pungkhawm.

All India Kisan Sangharsh Coordination Committee (AIKSCC) kaihhruaina hnuaiah nawrh hi huaihawt a ni a, he hunah hian loneitu pawl 180 chuang an tel.

Pungkhawmte chuan ramchhung hmun hrang hranga loneituten harsatna an tawh mekte sawiin, an thlai enkawl senso leh a hralhchhuahna man inmil lo lutuk te, leiba ngah avanga loneitute eng emaw zatin an intihhlum phah chungchangte an sawilang a ni.

Loneitu pungkhawmte hian Ramlila Maidan aṭanga Parliament Street thleng kawng an zawh a ni. AIKSCC chuan sorkar laipuiah an thil phut pahnih–loneitute thlai thar man aṭanga 50% profit margin siamsak leh, Swaminathan Commission recom-mendation a taka kalpui tura an ngenna te an thlen bawk.

AIKSCC chuan fuel, pesticide leh fertiliser bakah tui man thlengin a sang chho vek tawh a, hei vang hian loneitute sum lakluh nen hian an inmil thei tawh lo niin a sawi. An senso leh an sum lakluh inmil loh vangin loneitute tam tak chu leiba nen an awm a ngaih phah a,mi tam tak an intihhlum phah bakah, ramchhung hmun hrang hrangah nawrh an huaihawt phah fo bawk a ni, a ti.