Congress hruaitu hlun Dasmunsi a thi

Congress Party hruaitu hlun leh union minister hlui, Priya Ranjan Dasmunsi chu kum 2008 aṭanga nikhaw hreloa a awm hnuin, nimin khan kum 72 mi niin a thi.

MP leh Information and Broadcasting Minister hlui, Dasmunsi hi kum riat kalta khan stroke vangin a pangkhing vei lam a zeng a, a hnuah nikhaw hreloin a awm a ni. Ram pawn lamah te enkawl tura hruai ni mah se a ṭha thei lo a ni.

West Bengal-a Raiganj Lok Sabha constituency MP, Dasmunsi hi kum 1970-71 chhung khan West Bengal-a Indian Youth Congress state president a ni a, prime minister hlui Manmohan Singh-a kaihhruai UPA sorkar hmasaah khan Information and Broadcasting minister a lo ni tawh bawk. Minister a nih lai hian khawthlang lam TV network, AXN leh Fashion TV-te chu an programme-ah mi nawlpui en atan mawilo a awm ni sawiin a lo khap tawh a ni.

Dasmunsi hi kum 20 dawn All India Football Federation president a lo ni tawh bawk a, India mite zingah FIFA World Cup game-a match commissioner ni thei hmasa ber a ni.

Dasmunsi hian a nupui, Deepa Dasmunsi leh fapa Priyadeep Dasmunsi te a kalsan a ni. A nupui pawh hi a Congress hruaitu leh minister hlui a ni.