PM Modi-a sawiseltute kut tansakah vau

Bihar-a BJP hruaitu Nityanand Roy chuan Prime Minister Narendra Modi-a sawiseltute chu an kut tansakah a vau.

Patna-a vantlang inkhawma thu a sawinaah, Rai chuan PM sawisel a, Modi-a kawktute kut chu a tansak tur thu a sawi a, political leader-te chu PM thlawp tlat tur hian a ti bawk. Rai chuan, "Mi rethei fapa chu retheihna aṭanga rawn ding chhuakin Prime Minister a rawn ni thei a ni. Danglamna hrang hrang nei mah ila, ram chhunga mitinte hian hei hi an ngaihlu tur a ni. Modi-a sawisel a, a laka kut lek khumtute chu ṭangrualin kan tichhe tur a ni a, a ṭul a nih chuan an kut kan tansak mai tur a ni", a ti.

Prime Minister Modi chuan ram hruaitu dinhmun chelh turin harsatna tam tak a paltlang a, hei hi mipuite pawhin an chhuang hle tur niin a sawi.

A thusawi hian sawisel a hlawh nghal hle a, hei vang hian nimin khan BJP hruaitu hian thupha a chawi leh nghal a ni. Rai chuan a thusawi chu dik lo taka lakkawi sak a ni tih sawiin, a thusawi avanga midang rilru a tina a nih chuan pawi a tiin thupha a chawi tih a sawi a, a thu lo sawi tawh chu a sut leh nghal tih a sawi bawk. A thusawi chu mimal emaw, eptu pawl emaw a sawi chhanna a ni lo tih a sawi.

BJP chuan Yadav hnam laka a dinhmun sawhnghehna tur kawng khat atan, Yadav hnam hruaitu, Rai hi nikum December thla khan Bihar-a an party hruaitu atan a dah a ni. Hajipur MLA, Rai hi kum 2014 Lok Sabha inthlanpuiah khan Ujiyarpur bialah ticket pek a ni bawk.