Sorkar in Israel missile lei tum ṭhulh

Sorkar laipui chuan Israel hnen aṭanga Spike anti-tank guided missile (ATGM) system, cheng vaibelchhe 3,200 man lei a tum chu a ṭhulh niin defence ministry thupuangtu chuan Thawṭanni khan a sawi.

Hetih lai hian Defence Research and Development Organisation (DRDO) chu India sipaite tan ATGM hi siam ve tura tih an ni thung nia sawi a ni.

India hian Israel firm Rafael Advanced Defence Systems Ltd. hnen aṭanga launcher 321 leh fire-and-forget missile 8,356 lei tuma inbiakna a kalpui hnuah a ralthuam lei tum chu a ṭhulh leh ta a ni.

Israel chanchinbu lamin an tarlan dan thung chuan Rafael thupuangtu, Ishai David chuan missile lei tur leh tur loh chungchangah hian thu chiang engmah a la awm lo niin a sawi a, Make-in-India program hmasawnna lama an thawhna pawh ruahman sa anga kal tlangpui a nih tur thu a sawi bawk.

ATGM lei ṭhulh a nih a, DRDO kutah missile siam hna hi dah a nih chuan India sipaite hian kum li tal an nghah a la ngaih rin a nih thu sipaite chuan an sawi.

Spike Missile te hian km 2.5 a hla aṭangin rathuama thuam motor leh bunker te an kapchhe thei a, sipaite chuan ATGM system hmang hian an sipai unit 400 tal thuamchak a lo tum ve mek bawk tih an sawi.

Missile lei tum chung-changa a kaihhnawih thil hrang hrangte ngaihtuah turin defence ministry chuan major general kaihhruai committee a din a, he committee din a nih aṭanga thla 10 hnuah missile lei lo tur hian thutlukna an siam a ni.

India hian kum li dawn kalta khan Israel ATGM system hi US Defence leh aerospace firm Raytheon's Javeline system aiin a lo thlang tawh a, Rafael pawh hian thawhdunna

ṭha zawk siam beiseiin Hyderabad-a Kalyani Group chu missile siam tur hian inremna a siampui ve a ni.