India kutah G20 president nihna hlan

G20 summit neih tawp ni, nimin khan Indonesia president Joko Widodo chuan group president thar dinhmun chu India ram prime minister Narendra Modi kutah a hlan.

G20 president dinhmun hi member ramten an inchelh chhawk ṭhin. India hi kumin December 1 aṭangin, kum khat chhung G20 president a ni dawn a ni. Prime minister Modi chuan group president dinhmun an chelh tur chu India ram mipuite tan inchhuanna tham a ni, a ti.

G20-ah hian Argentina, Australia, Brazil, Canada, China, France, Germany, India, Indonesia, Italy, Japan, South Korea, Mexico, Russia, Saudi Arabia, South Africa, Turkey, UK, US leh European Union an tel. Heng ram 20-ah hian khawvel puma mihring cheng zinga hmun thuma ṭhena hmun hnih an cheng a, member ramte GDP hi khawvel pum GDP aṭanga 80% chuang a ni pha bawk.

Modi leh Biden-te inkawm
Prime minister Narendra Modi leh US president Joe Biden-te chuan G20 summit neih karah Thawhlehni khan meeting neiin, ram pahnihte inlaichinna leh thawhdunna chungchangte an sawi dun.

Ministry of external affairs (MEA) chuan hruaitu pahnihte hian global leh regional development chungchang te, Ukraine-a indona thleng mekte an sawidun bawk tih a tarlang.

PM Modi chuan India-US thawhdunna tihchakna kawnga a hmalaknaah President Biden chu lawmthu a hrilh a, India-in G20 president dinhmun a chelh chhung pawhin thawhdunna nghet tak an neih zui zel a beisei thu a sawi.

Modi hian summit neih karah Britain prime minister Rishi Sunak leh World Bank president David Malpass bakah ram dang hruaitute pawh a kawm a ni. Sunak leh Modi-ten meeting an neih zawh hnu hian India ram aṭanga UK-a hnathawk tura kal theihna tur, kumtina professional 3,000 hnena visa pekchhuahna tur chu Britain PM hian a pawmsak nghal a ni.