2021-a khualzin nuai 15.24 chuangin India tlawh

Home ministry chuan kum 2021 chhungin India tlawhtu, ramdang khualzin nuai 15.24 an awm a, a tam ber chu US aṭanga kal an nih thu a sawi.

Ministry chuan Covid-21 hri leng vanga khuahkhirhna hrang hrang siam a ni chungin, ram dang aṭangin khualzin nuai 15 chuang an rawn lut a, heng zingah hian US aṭanga kal nuai 4.29 awmin, Bangladesh aṭangin nuai 2.4 an awm bawk a, khualzin rawn lut zinga 74.39% chu ram 10-a mi an ni, a ti. Khualzin rawn lut zingah hian UK aṭangin nuai 1.6, Canada aṭangin 80,437 leh Nepal aṭangin 52,544 a awm bawk. Afghanistan aṭangin khualzin 36,451, Australia aṭangin 33,864, Germany aṭangin 33,772, Portugal aṭangin 34,064 leh France aṭangin khualzin 30,374 an tel a ni.

Covid-19 hri leng vangin kum 2020, March 25-April 21 chhung khan international flight tihtawp a ni a, ṭum thum pawtseiin, May 31 thleng khuahkhirhna siam a ni. Kum 2020, June thla aṭang khan khuahkhirhna ṭhenkhatte hlih chho ni mah se, kum 2021 lam thlengin hun eng emaw chen chu khuahkhirhna hi siam a la ni.

Kum 2021, March thla khan MHA chuan ram 156 tan sub-category hrang hrangah e-visa a pechhuak leh ṭan a, hemi kum vek October 15 aṭang khan tourist leh e-tourist visa a phalsak leh ṭan bawk.