Delhi boruak bawlhhlawhin ziaawm lam pan

Delhi khawpui boruak bawlhlawh chuan nimin khan ziaawm lam a pan hret. Nimin zinga Air Quality Index (AQI) chu 176-ah tla hniamin, 'moderate' category-ah a tla thla tawh. Thawhlehni khan AQI hi 221 a la ni.

System of Air Quality and Weather Forecasting and Research (SAFAR) chuan Delhi khaw ṭhenawmah thlai ro hal a ziaawm chhoh leh, thli tleh dan a ziaawm ṭan avangin November 14 aṭang khan Delhi leh National Capital Region (NCR)-a air pollution pawh a tlahniam ve zel tih a sawi.

Indian Agricultural Research Institute (IARI), Punjab-in a tarlan danin, Thawhlehni khan Delhi ṭhenawm, Punjab-ah hmun 141-ah lo hal niin, Thawhṭanni khan hmun paliah chauh hal a ni bawk. Kar liam ta Inrinniah kha chuan hmun 2,467-ah zet lo an hal a ni. Lo hal khu hi Delhi khawpui boruak tibawlhhlawhtu pakhat a ni a, lo hal an tlem chhoh tak avangin Delhi boruak pawhin ziaawm lam a pan chhoh zel beisei a ni.

Air quality a ṭhat chhoh avangin, Commission of Air Quality Management chuan Delhi-NCR-a Graded Response Action Plan stage 3 hman chu titawp tawh turin thuneitute a hrilh. Stage 3 hnuaiah hian in sak leh ṭhiahte khap a ni.