Delhi-ah cancer damdawi lem Rs vbc 8 man hu an man

Delhi Crime Branch chuan cancer damdawi lem cheng vaibelchhe 8 hu an man a, damdawi siamnaa inhnamhnawihte an man bawk.

Crime branch-a special commissioner RS Yadav chuan damdawi lem siamnaa inhnamhnawih an mante hi engineer pahnih, doctor pakhat leh MBA pakhat an ni tih a sawi. Mi dangte pawh man tuma zawn mek an nih thu a sawi bawk.

Yadav chuan Sonipat, Haryana-a factor pakhat leh Ghaziabad-a godown chu damdawi lem siamna atana hman niin, kum 3-4 vel an lo siam tawh a ni, a ti.

November 14 khan Delhi Police-a cyber crime wing chuan online hmanga Ola electric scooty zuar, mi tam tak bumnaa inhnamhnawih mi 20 an lo man tawh bawk. Online hmang hian mi 1,000 chuang an lo bum hman tih an sawi. Heng mite hian Ola scooter zawrhna website lem siamin, he website kaltlang hian scooter lei duhte chu online booking, Rs 499-in an tihtir ṭhin.