2017 chhungin Kashmir-ah firfiak 202 thah an ni

Sorkar laipui thuchhuah chuan security force ten kumin chhungin Kashmir-ah firfiak 202 an thah thu a tarlang. Sipai, police leh paramilitary-te ṭanrual vanga hetiang zat hi that thei an nih thu sorkar chuan a sawi bawk.

Sorkar official chuan sorkar sipaite hi tunhnaiah firfiak beihna kawngah hian an thawk rim hle tih sawiin, firfiak beihna kawngah pawh hian security force hrang hrang an ṭanrual thu a sawi.

Sipai, Jammu and Kashmir police leh CRPF ṭangrualten firfiak 202 an thah zingah hian firfiak pawl Jaish-e-Mohammed, Lashkar-e-Toiba leh Hizbul Mujahideen mi leh sa te an tel a, firfiak hotu lu 25 an tel bawk a ni.

Hetiang zat firfiak thah an nih theih avang hian sorkar chuan Army chief Gen Bipin Rawat, Jammu and Kashmir's director general of police SP Vaid leh CRPF hotute chungah lawmthu a sawi. Sorkar thupuangtu chuan security force te an chet ṭhat chhan chu J&K police te an inrawlh vang niin a sawi a, Punjab-ah pawh tualchhung police te an inrawlh aṭang chiahin firfiak beihna lamah hma an sawn thu a sawi.

Kashmir-ah firfiakte bei turin tualchhung police-te aia ṭangkai an awm bik chuang loh tih sawiin, sorkar official chuan a hmun leh hma zawng zawng bel taka an hriat avangin an tan hma lak a awlsam a ni, a ti. Hei vang hian firfiakte beihletna kawngah pawh hian an thawhhlawk hle niin a sawi. Kumin chhung hian firfiak chetna pawh kumdang aia a tlem sawt thu sawiin, firfiak te tawmbuk eng emaw zat tihchhiat a nih thu a tarlang bawk.

Inrinni pawh khan IAF Special force, Garud leh sipai ṭangrualten Bandipora District-a Hajin area-ah firfiak tawmbuk beiin mi eng emaw zat an that a ni. He inbeihnaah hian Garud Commando pakhat chuan nunna a chan a, hetihlai hian Pakistan firfiak paruk te kahhlum an ni thung.

Sorkar official chuan Kashmir mipuite ngaihdan la turin sorkar interlocutor Dineshwar Sharma tirh a nih tur thu a sawi a, inbiakna kalpui lai mek pawh ni mah se sorkar laipui lam pawn firfiakte beih hna hi nasa zawka kalpui a nih zel tur thu pawh a sawi bawk. J&K-a Pakistan inrawlh dan chungchang pawh sawiin, ṭum dang zawng aia nasain Kashmir Valley-a boruak sawi danglam an tum dawn niin a sawi a, tun dinhmunah chuan mi lar leh mi langsar te an bitum a rin thu a sawi bawk. Firfiak te hian Punjab-ah RSS hruaitu Brigadier (retd) Jagdish Gagneja pawh an lo that tawh a ni.