Hardik Patel-an Congress a thlawp

Gujarat-a Patidar hnam hruaitu, Hardik Patel chuan thla thara assembly inthlan neih turah Congress party a thlawp dawn tih a sawi.

Assembly inthlan neih turah hian Congress party-in Hardik Patel-a pawl, Patidar Anamat Andolan Samiti (PAAS) tana seat a pek phalzat chungchanga an intithiam lo a, hei vang hian Patel pawh hian Congress chu sawiselin, BJP nen ang khat reng niin a lo sawi tawh. Mahse hemi hnu hian Congress hian an policy hamṭhatna dawng tura Patet-te telh an nih dan tur siampuiin, an inrem leh thei ta a ni.

Congress party hian a tirah chuan PAAS hi candidate pali an neih a remti a, candidate-te hmig pawh a puansak hnuah an ruahmanna siam hi ennawn lehin, seat khat chauh a pe leh a ni. Hei vang hiang PAAS worker-te chu an lungawi lo hle a, Pathianni zan pawh khan Surat-a Congress office chu an suasam a ni.

Patel hnam hi Gujarat voter zinga 14% an tling phak a, hun rei tak BJP an lo thlawp tawh a ni. Mahse Hardik Patel-a kaihhruaina hnuaiah policy hrang hranga hamṭhatna dawng ve thei tura Other Backward Class or OBC-a dah an phut a ni. Hardik Patel chuan an thil phut hi BJP in a tihlawhtlin sak theih loh vangin, December thlaa assembly inthlan neih turah Congress chu thawhpui a tum a ni.

Gujarat assembly inthlan hi December 9 leh 14 hian neih a ni dawn a, December 18 ah vote tla chhiarin, result puan nghal a ni ang.