Pawisa tih thih chungchangah sorkar laipui insawifiah

BJP kaihhruai sorkar laipuiin kum 2016, November 8-a pawisa note lian pahnih, Rs 500 leh Rs 1,000 note a tih thih chungchanga Supreme Court-in petition lutte ngaihtuah a, insawifiah tura hriattir hnuah Nilaini khan sorkar laipui chuan a thiltih chungchanga insawifiahna hi court-ah a thehlut.

Supreme Court-a affidavit a thehluhah, sorkar laipui chuan pawisa tih thih a nih hma thla riat, kum 2016, February thla khan Reserve Bank of India chu a lo sawipui ṭan tawh tih a sawi. "RBI lam nena uluk taka sawiho leh a theih anga inbuatsaih lawkna te kalpui a nih hnuah he thutlukna hi siam a ni. Hetih laia finance minister pawh khan hemi chungchang hi Parliament-ah pawh a lo sawi lang tawh a ni," a ti.

Pawisa note pahnih tih thih a nih chungchangah RBI thurawn anga thutlukna siam a nih thu sawiin, sorkar laipui chuan heng pawisa note thlakna tur atan hian a design thar, security ink leh printing plate ṭha zawk, printing machine thlakna turte a buatsaih lawk vek a ni tiin a sawi. He thutlukna hi economy policy siamṭhatna tura hmalakna pawimawh tak; pawisa lem leh pawisa chheprelh tam tak tak beihletna tura thil pawimawh a nih thu a sawi bawk. Hei bakah RBI data aṭanga a lan danin, pawisa note tih thih a ni hma kum nga aṭang khan Rs 500 leh Rs 1,000 note lengvel chu a tam chak lutuk a, hei vang hian pawisa lem tam chho zel leh black money danna turin RBI leh sorkar laipui chuan pawisa note series thar siam chu a ngaihtuah ta a ni, tiin a sawi.