Nov 19-a Bharat Jodo Yatra-ah hmeichhiate chauh tel dawn

Congress party chuan Bharat Jodo Yatra an neih mekah, prime minister Indira Gandhi piancham, November 19-a yatra neih turah Rahul Gandhi kiangah hian hmeichhiate chauh an kal dawn tih a sawi.

Party general secretary, incharge of communication leh Rajya Sabha MP Jairam Ramesh chuan, "Indira Gandhi Jayanati-ah chuan Rahul Gandhi rualin nilengin hmeichhiate chauh yatra-ah hian an tel ang," a ti.

Bharat Jodo Yatra hi Maharashtra state-ah an nei mek a, November 19 hian Buldhana district-a Shegoan aṭanga kal ṭanin Bhendval, Jalgaon Jamod-ah an tawp ang.

Rahul Gandhi hian a pi, Indira Gandhi thih cham, October 31 khan a twitter-ah a pi zahna hlanin, ram tana a inpekna chu a thlawnin a liam tir mai dawn lo tih a sawi.

Yatra hi Tamil Nadu, Kerala, Karnataka, Andhra Pradesh, leh Telangana-ahte neih a nih hnuin Maharashtra-ah an nei mek. Rahul Gandhi hian Maharashtra-ah hian district panga-a assembly 15 leh parliamentary constituency 6 a kaltlang tawh a, km 382-a thui an kal hnuah Madhya Pradesh state an lut dawn a ni. Gandhi-a'n yatra a neih mek hi Indian politician zingah ke-a kawng zawh thui ber tur a ni tih Congress chuan sawiin, an party bakah political party dang leh social organisation hrang hrang pawhin an thlawp ṭha hle a, nitin thlawptu hi an pung zel a ni, an ti.

Nimin kha Yatra an kal ni 71-na a ni a, state parukah district 30 an kal tlang tawh a, Maharashtra-a Akola district-ah an awm mek a ni.

September 7 khan Bharat Jodo Yatra hi Kanyakumari aṭanga neih ṭan a ni a, Kashmir-ah an tawp dawn a ni. Km 3,570-a thui an kal turah km 1,608 kal hmabak an la nei. An tawpna tur hmun hi kum thar lamah an thleng ang.