OPS lamin AIADMK symbol chang

Tamil Nadu-a rorellai, All India Anna Dravida Munnetra Kazhagam (AIADMK) party hnuaia pawl pahnihte chuan an party symbol, hnam pahnih lem changtu zawk nih an inchuhna chu nimin khan Election Commission chuan chingfelin, Chief Minister Edappadi K Palniswami leh Deputy CM O Panneerselvam-te lam, OPS pawlin symbol neitu nihna hi an chang ta a ni.

AIADMK hnuaiah hian lamṭang pahnih, OPS lam leh VK Sasikala-i vahpa TTV Dhinakaran-a kaihruai lam an awm a, an party symbol hmangtu zawk nih hi an inchuh a ni. Party symbol hi eng lam mah mahin hman theih lohin hun eng emaw chen dah a lo ni tawh a ni. An buaina hi EC-ah thlenin, thla eng emaw zat hnuah EC chuan thutlukna a siam ta a ni. AIADMK hruaitu hlui, Jayalalithaa-i leh party founder, MG Ramachandran (MGR)-a nupui thihsan, MRG Janaki te chuan party symbol changtu zawk nih hi an lo inchuh tawh bawk a ni.

Dhinakaram-a lamte chuan EC thutlukna siam hi sawiselin, OPS lam chan PM Narendra Modi-a kaihhruai sorkar an tlawn avangin symbol changtu hi an ni thei niin an sawi. Mahse an puhna hi thu dik lo a nih thu sawiin, OPS lam chuan MLA, MP leh party worker pawh an ngah zawk a, hengte hi EC chuan uluk taka a zirchian hnuah thutlukna hi a siam niin an sawi thung. An ṭanna chhan tinghet tur hian EC-ah document pawimawh hrang hrang pawh an thehlut niin Palaniswami chuan a sawi.