PM-in Global Conference on Cyber Space hawng

Prime Minister Narendra Modi chuan nimin khan Delhi-ah Global Conference on Cyber Space, GCCS ṭum nga-na a hawng. GCCS hi khawvela cyber space chungchanga conference lian ber zinga mi a ni.

Ni hnih awh tur conference thupui atan hian 'Cyber4All: A Secure and Inclusive Cyberspace for Sustainable Development' tih hman a ni.

GCCS hmasa ber hi kum 2011 khan London-ah neih a ni a, 2012-ah Budapest-ah neih niin, ram 60 dawn aṭangin palai 700 an tel. A ṭum thumna chu kum 2013 ah Seoul-ah neih a ni a, a ṭum li-na chu 2015 khan The Hague, Netherlands-ah nghah niin, ram 97 an tel.

Electronics & IT and Law & Justice Minister Ravi Shankar Prasad chuan thu sawiin, India-in GCCS ṭum nga-na a thleng chu lawmawm a tih thu a sawi a, hei hi cyber space lama India dinhmun pawimawh chhoh zel hriatpuina pakhat a nih thu a sawi. Tun ṭum GCCS ah hian ram 131 telin, palai 10,000 an awm a, ram 26 aṭangin minister an tel thei bawk.

Prasad chuan firfiakten social media hman ṭangkai an tum ṭhin chu dang turin India chuan theihtawp a chhuah zel dawn tih a sawi. Cyber space him leh rintlak siam a pawimawh thu a sawi bawk.