Sorkar laipuiin NHM fund titlem

Sorkar laipui chuan flagship public health programme tana kum thum budget tur pawmin, health ministry in sum mamawh zat nia a tarlan aia 20% a tlem a dah.

Finance Ministry chuan kumin August thla khan National Health Mission chu a tithar leh a, kum 2017-20 chhung atan fund dollar maktaduai 20 a dah a ni. Hetih lai hian health minsitry chuan fund atan hian dollar maktaduai 25 mamawh a nih thu a sawi thung.

Official-te chuan finance ministry-in fund a tihhniamna chhan chu thildang hmanna tur pawimawh a tam vang te, state sorkarin health budget an hman dan ṭhat tawk loh vangte niin a sawi. Mahse fund tihhniam a nih chungchanga zawhna hrang hrangte chu finance leh health ministry lamin an la chhang lo.

National Health Mission hi khawvela health programme lian ber zinga a ni a, he programme hnuaiah hian thingtlang mi rethei maktaduai tel hnenah a thlawna damdawi sem a nih bakah, immunisation service te kalpui a ni.

Prime Minister Narendra Modi-a kaihhruai NDA sorkar chuan public healthcare tihchangtlunna turin kawng hrang hrangin hma a la a, health budget pum pawh 27% a tisangin, damdawi eng emaw zat man tihhniam a ni bawk. Hetih lai hian sawiseltute chuan public health system siamṭha tur chuan tihtur hmabak a la tam hle niin an sawi.

Kum 2016 khan India ramah naupang 900,000 chu kum nga an tlin hmain an thi a, khawvela kum nga hnuai lam thi tamna ber ram a ni.