Hafiz Saeed-an Kashmir zalen nan beih a tum

Pakistan firfiak pawl, Jamaat-ud-Dawa (JuD) hotu Hafiz Saeed chuan Kashmir zalenna tura a beih zel tur thu a sawi.

Kum 2008 November 26-a Pakistan firfiakten Mumbai khawpui an beihnaa mawhphurtu bera puh, Hafiz Saeed hi hun rei tak zalen taka a awm hnuin, January thla khan pawn chhuak thei loin, house arrest-a hren a ni. Mumbai beihnaah hian mi 166 an thi a, mi tam takin hliam an tuar bawk.

US chuan JuD hotu Saeed-a man a nih theih nana a awmna leh a chanchin hrilh theih hnenah lawmman, dollar matkaduai 10 pek a lo tiam tawh a ni.

Hun eng emaw chen house arrest-a hren a nih hnuin, Lahore High Court chuan hrenbeh a nihna tur hian sorkar chuan finfiahna rintlak a pe thei lo nia sawiin a chhuah zalen a ni. Chhuah zalen a nih hnu lawkah, Saeef chuan video message tichhuakin, Kashmir independence na tura a beih tur thu a sawi.

House arrest a nihna aṭanga chhuah a nih chungchanga India a deuna thu a sawichhuak bawk a, India chuan hrenbeh a nih theihna turin theihtawp a chhuah a, mahse a beihna te chu awmzia a awm ta lo a ni, a ti. Chhuah zalentu judge-te chungah lawmthu a sawi nghal bawk.