VYAPAM scam : CBI-in mi 592 lakah thubuai a thehlut
Central Bureau of Investigation (CBI) chuan Madhya Pradesh-a Vyapam scam buaina kal zelah nimin khan mi 592 lakah thubuai a ziaklut.
Vyapam scam tia sawi hi kum 2012-a Madhya Pradesh Professional Examination Board (MPPEB)-in pre-medical test a buatsaih, dik lo taka kalpui a nih chungchang a ni.
CBI-in thubuai a siam sak zingah hian Madhya Pradesh-a private medical college pali-a principal-JN Choksey, LN Medical College; SN Vijayawargiya, People's Mecial College; Ajay Goenka, Chirayu Medical College leh Suresh Singh Bhadoriya, Medical College Bhopal-te pawh an tel a, anni bakah hian college official 22 an tel bawk.
State sorkar hnenah ziaka thlenin, CBI chuan dik lo taka pre-medical test kalpui a nih dan hi Medical Council of India-ah pawh an thlen a, entrance examination buatsaiha inlan lo, zirlai 229-te college pali-ah seat pek nia sawi chungchang pawh chhui chiang tura ngen a nih thu a tarlang.
CBI official chuan college-te hian kum 2012-a Supreme Court rorelna pawh an palzut niin a sawi. Heng college-a state quota pawh merit list anga pek a ni lo, a ti.
Official chuan entrance exam buatsaihah hian candidate te aiawha chhansak leh a ruaitu mi 334 an awm a, midang te chhanna copy tura thamna petu mi 155, Vyapam official pali, exam vigilator 46, middlemen 22 leh state Deparment of Medical Education-a official pahnihte pawh thubuai ziahluhah hian an tel tih a sawi.