November 26-ah loneitute'n kawngzawh an huaihawt dawn

Sorkar laipuiin sawisel hlawh tak, farm bill pathum a siam avanga kum 2020-a loneituten lungawi lohna kawngzawh an neih ṭan ni champha, November 26 hian loneitute chuan sorkarin a thil tiamte a bawhzui loh avanga lungawi lohna lantirin state hrang hrangah kawngzawh huaihawt an tum.

Loneitu pawl lian ber, Samyukta Kisan Morcha (SKM) chuan November 26 hian state hrang hrangah loneitute chuan lungawi lohna lantirnan Raj Bhavan panin kawng an zawh dawn tih a sawi a, December 8 hian hma an lak zel dan tur ngaihtuahin meeting an nei dawn tih a tarlang bawk. 'Raj Bhavan pana kawngzawh huaihawt hi loneitute lungawi lohna lantir chhunzawm lehna tura bulṭanna a ni ang," tiin an tarlang.

Ram chhung hmun hrang hranga loneitute chu kawngzawh tura inbuatsaih tur leh, sorkarin an laka thil a lo tiam tawhte tihlawhtling tura nawr chhunzawm turin an ngen tih SKM hruaitu Darshan Pal chuan a sawi.

Sorkar laipuiin farm law a sût ni, November 29 chu loneitu pawl hian 'Fateh Diwas' (victory day) ah an hmang dawn bawk a ni.

SKM chuan nikum December 9-a sorkar laipuiin ziak ngeia intiam a, MSP chungchang buaipui committee din leh electricity bill sut te chu tun thlengin a la tihlawhtling lo tih an sawi. Sorkarin ziak ngeia atiam avangin nikum December 11 khan Delhi border-ah hun rei tak nawrh huaihawttu loneitute pawhin an in lam a pan a ni, a ti. 

Mahse MSP committee din a la ni lo a, nawrh huaihawt laia dik lo taka loneitu ṭhenkhat laka thubuai siamte pawh sut a la ni lo bawk tih SKM chuan a sawi. An thil phut chungchangah sorkar laipuiin hma a lak zui loh avangin nawrh huaihawt chhoh leh hi an tum a, village level aṭangin an ṭan phawt ang a, a ṭul dan azirin rampum huapin an nei chho leh dawn tih an sawi bawk.