NC President thlannaah Farooq Abdullah-a'n chuh tawh dawn lo

Jammu and Kashmir chief minister hlui, National Conference party president ni mek Farooq Abdullah chuan December 5-a party president thlannaah chuh a tum tawh lo tih a sawi.

Abdullah chuan party hruaitu thar tur thlan hma chuan president dinhmun hi a la chelh dawn tih a sawi. Inthlana chuh a tum tawh loh chhan sawi nghalin hruaitu inthlak a hun tawh a ni, a ti. "Hruaitu naupang zawkten party hi an kaihhruai ka duh tawh a ni. Kum 86 mi ka ni tawh a, ṭhalai zawkin mawhphurhna hi an laka hun ta," tiin a sawi. Party president post hi member tu pawhin an chuh thei dawn a ni.

Farooq Abdullah hian kum 1981, August thla aṭang khan National Conference president hna hi a chelh a, kum 2002 June khan a fapa Omar Abdullah chuan a thlak a ni. Mahse kum 2006-ah party hotu lu ber dinhmun hi a luah leh a ni.

Abdullah chuan party hruaitu dinhmun chuh zui dawn lo mah se, Jammu and Kashmir special status pekna leh, state dinhmun pe kir leh tura beitu, regional party-te intelkhawmna Gupkar alliance erawh a la kaihhruai chhunzawm zel tur thu a sawi.