PM Modi-a'n Gujarat-ah road show nei ; Vawiinah Rahul Gandhi-a'n public rally nei dawn

Assembly inthlan neihna tur, Gujarat state-ah political party hrang hrangte an campaign ngawrh tawh hle.

Prime minister Narendra Modi chuan nimin khan Valsad district-a Vapi khuaah road show a nei a, he hunah hian BJP mi leh sa tel an ṭhahnem hle. Prime Minister hian state chhung hmun hrang hrangah programme hmun riat velah a la nei dawn a ni. Nimin aṭanga November 22 thlengin, a zawna ni thum chhung Saurashtra biala rally neih chu PM hian a telpui dawn a, he hunah hian mi nuai 1.5 chuang an tel dawn niin party lam chuan an sawi.

Assembly inthlan hnuhnung berah khan Saurashtra bialah BJP hian seat lak an nei lo a, state pumah party mala sorkarna nei thei khawpin chak mah se, Congress chakna bialah hian seat khat pawh an la lo. Hei vang hian tun ṭum inthlanah he bial aṭanga seat lak ngei tumin an bei ngawrh hle.

Gujarat chief minister hlui, PM Modi hian Gujarat-a a cham chhung hian party hruaitute pawh closed-door meeting a neihpui dawn a, an party thuam chak dan turte an sawipui ang. Gujarat hi BJP chakna niin, kum 27 chhung sorkarna an chang tawh a, Narendra Modi pawh Gujarat chief minister ni rei thei ber a ni. PM Modi-a home state anih bakah, union home minister Amit Shah home state a ni bawk.

Congress party hruaitu Rahul Gandhi pawhin vawiin hian Rajkot leh Surat-ah public rally a nei ve dawn bawk. Bharat Jodo Yatra nei mek, Rahul Gandhi hian nimin khan Maharashtra aṭangin Madhya Pradesh a lut. Vawiinah Gujarat-a public rally hmang tur hian a kal dawn a ni. Yatra a neih hma, thla hnih leh a chanve liam ta khan Gandhi hian Gujarat hi tlawhin, Ahmedabad-ah rally a nei a ni.

Gujarat assembly inthlan hi thawh hniha neih a ni dawn a, December 1 leh 5-ah vote thlak a ni dawn a, December 8-ah inthlan result hi puan a ni ang. Inthlan thawh khatna hi assembly bial 89-ah neiin, a thawh hnihna hi bial 93 ah neih a ni ang.

Kum 2017 inthlanah khan BJP hian seat 182 awmna assembly-ah seat 99 la in, Congress hian seat 77 an la thung. BJP hian kum 2012 inthlan aiin seat 16 in an la tlem a, Congress hian inthlan hmasa aiin seat 19 in an la tam thung. Sorkar siam turin seat 92 neih phak a ngai dawn a ni.