J&K Police-ten journalist 7 in an dap

Jammu and Kashmir police-te chuan tun hnaia firfiak pawlten journalist-te vauna a tihchhuah avangin, Inrinni khan Kashmir Valley-a journalist pasarihte chenna in an dap a, an zinga ṭhenkhat chu thu zawhfiah turin an hreng zui bawk.

Police-te chuan lawyer pakhat chenna in bakah, Pakistan leh Turkey-a awm mek, hel pawl commander-te nia sawi chenna in pawh an dap tel bawk a ni. South City, Srinagar-a SP Lakshya Sharma kaihhruaiin Kashmir Valley-a journalist leh midangte chenna in enfiah a nih thu police thuchhuah chuan a tarlang.

November 13 khan Kashmir Valley-a English newspaper pahnih chuan The Resistance Front (TRF) aṭangin vauna an dawng a ni. Police-te chuan he pawl hi Pakistan firfiak pawl, Lashkar-e-Taiba hnuaia mi niin an sawi. Vauna an tawh hnu hian English newspaper-a thawk journalist parukte chu an bang tawh a ni.

Police-te chuan hmun hrang hrang an dapna aṭang hian mobile phone, laptop, memory card, pendrive leh digital device dang, document, bank paper, rubber stamp, passport leh pawisa fai eng emaw zat an man tel.