Pawngsual leh tualthattu mi 3 chhuah tum chungchang Delhi sorkarin Supreme Court thutlukna a khing let dawn

Delhi chief minister Arvind Kejriwal-a kaihhruai sorkar chuan kum 2012 mi pawngsual rawn leh thata puha thiam loh chantir tawh mi pathumte Supreme Court-in chhuah zalenna tur thupek a siam chungchang chu a khing let dawn.

Delhi lieutenant governor VK Saxena chuan nimin zing khan Delhi sorkarin Supreme Court thutlukna ennawn tura phutna petition thehluh a tum chu a pawm a ni. Hemi hma hian pawngsual rawn tuartu nu leh pate hian Governor hmuin, Supreme Court thutlukna siam chuan an rilru a ti na takzet tih an hrilh a ni. Pawngsualtu mi pathumte chhuah an nih dawn avangin police venhimna siamsak turin an dil nghal bawk.

Governor chuan Supreme Court thupek an khinletna turah hian Delhi sorkar aiawha ding tur solicitor general Tushar Mehta ruatna chu a pawmsak nghal bawk a ni.

Supreme Court-in thiam a chantir tak mi pathumte hi kum 2012, February thlaa Delhi-a Chhawla hmuna hmeichhe kum 19 mi pawngsual rawn a, that zuia puhte an ni. Hmeichhe ruang hi an khawih aṭanga a ni thum hnuah Haryana leiletah hmuh a ni a, a taksa hmun tam takah hliam a nei a ni.

Delhi trial court chuan kum 2014, February thla khan heng mi pathumte hi thiam loh chantirin, thi turin an chungthu a relsak a, hemi kum vek August 26 khan Delhi High Court chuan hremna pek hi pawmpuiin a nemnghet leh bawk.

Mi pathumte hian High Court hremna pek hi Supreme Court-ah khingin tihnep sak turin an ngen a ni. November 7 khan chief justice of India UU Lalit kaihhruaia justice S Ravinda Bhat leh Bela M Trivedi-te awmna bench chuan ngaihtuahin, High Court thutlukna siam hi a hnawlsak a, thiam loh chantir an nih chungchangah finfiahna ṭha tak a awm lo niin a sawi a, chhuah zalen turin thupek a siam zui a ni.

Supreme Court thutlukna siam hian sawi zui a hlawh hle a, Delhi sorkarin khin let a tum bakah, pawngsual tawktu hmeichhe nu leh pate chuan rorelna dik a awm theihna atan an bei zel dawn tih an sawi bawk.