Maoist-ten Chhattisgarh-ah Motor 3 leh mobile tower 4 hal

Moaist helten Chattisgarh-a Kanker district-ah motor pathum, kawngsiamna atan khawl hman pahnih leh mobile tower pali an hal tih police-te chuan an sawi.

Kanker superintendent of police Shalabh Sinha chuan Pathianni zan leh nimin zing khan Moaist-te hian hmun hrang hrangah pawikhawihna hi an thlen tih a sawi a, mahse mihring hliam leh thi report erawh a awm lo niin a sawi. Pawikhawihna thlenna hmun hrang hrangah hian Maoist-te hian banner leh poster-te an tar bawk a, thla liam taa police-te nen an inbeihnaa an pawl hruaitu pahnih thah an nih vanga lungawi lohna lantir­in, vawiinah ni lenga bandh huai­hawt an tum thute an tarlang a ni.

Helpawl hian motor, khawl leh mobile tower-te an hal bakah, Koyalibeda-Marda leh Antagarh- Narayanpur state highway chu thing dahin an dang bawk.

October 31 khan police-te nen an inbeihnaah Moaist North Baster division committee member Darshan Padda (32) leh commander Jagesh Salaam (23) te chu kahhlum an ni. Padda hi a lu manah Rs nuai 8 phal a lo ni tawh a, kum tam tak chu North Baster bialah hian chetlain, Maoist-ten pawikhawihna an thlen ṭum 39 velah a inhnamhnawih niin police-te chuan an sawi.

Security force-te chuan kar liam ta khan Jharkhand state-a Latehar district-ah Maoist helten improvised explosive device (IED) 120 an kam chu an hmuchhuak bawk a, heng IED an hmuhchhuahte hi sût nghal an ni. IED an hmuhna hi Budapahad area niin, he bial hi Moaist hel hluarna ṭhin a ni a, mahse security force-te hian hel lakah beihpui thlak mekin camp pawh an siam tawh a ni.