Rozgar Mela : PM-in mi 71,000 chuangte appointment letter sem

Sorkar laipuiin 'Rozgar Mela' (employment fair) a kalpui mekna hnuaiah, nimin khan prime minister Narendra Modi chuan video conferencing kaltlangin hna thawktu lak thar, mi 71 056-te appointment letter a semchhuak.

Prime Minister hun hman rual hian ram chhunga hmun 45-ah appointment lehkha hi hnathawktu lak tharte hi sem an ni a, assembly inthlan neihna tura Gujarat leh Himachal Pradesh-ah chuan model code of conduct hman mek a nih avangin sem a ni ve hrih lo. October thla khan appointment letter hi 75,000 chuang sem chhuah a lo ni tawh bawk.

PM Modi chuan June thla khan kum khat leh a chanve chhungin thawktu nuai 10 a tahtawlin lak a ni dawn tih a sawi a, hemi atan hian department leh ministry hrang hrangte chu an hnuaia hnaruakte hnawhkhah tura chak zawka hma la turin a hrilh a ni.

PM chuan ṭhalaite chu India ram chakna thahruite an ni tiin, sorkar chuan a tahtawlin a tam thei ang sorkar hna pekna turin hma a la zel a ni, a ti.

Modi hian Karmayogi Prarambh module a tlangzarh nghal a, he module hi thawktu lak tharte tana online orienation course pekna tur a ni. Sorkar hnathawkte tana kaihhruaina, code of conduct pawh telh niin, workplace ethics leh integrity, human resource policy-te bakah allowance leh hamṭhatna dang hrang hrangte tarlan tel a ni bawk.