Pune-a car 48 accident thlenna chhan engine switch off vang

Mumbai-Bengaluru highway-a Pathiannia truck chesualin a hmaa motor tlante su a, motor 48 zet an insut buaina chhan chu truck driver-in kawng chhuk a tlan laia engine a switch off vanga thleng a ni tih police-ten an sawi. He chetsualna thleng vang hian truck driver leh mi dang pakhat man an ni.

Pathianni khan Naval bride-ah truck hian a hmaa motor tlante su in, highway-ah motor 48 zet chu an insut phah a, motor 24 vel an chhia a ni. Mi 30 velin hliam an tuar bawk a, an zinga ṭhenkhat damdawi-inah dah an ni.

Pune police inspector Shailesh Sankhe chuan truck driver Maniram Yadav leh a assistant Lalit Yadav-te chu man an ni tawh tih sawiin, an pahnih hian Indian Penal Code leh Motor Vehicles Act hnuaiah thubuai siamsak an ni bawk.

Truck hi Tamil Nadu aṭanga kal niin, a phur rit hle. Kawng chhuka a tlan laiin a engine a switch off a, hei hian a brake lam ti buaiin a hmaa motor tlante chu su in, heng motor-te hian an hmaa motor dang an su chhawng ve leh a, motor 48 zet an insutbuai phah ta a ni.